1Ti 5 | KYG | STEP | Kagaemo alopa vaya'aife'mo lokiya kagemo o'aika afokamofe'mo ha nepaina agufa kagemo aika hapa nepaika alika api aika apato. Konagakamogife'mo hapa nepaina agufa gemo huka neya vaya'aife'mo hapa nepaika alika api aika apato.

1 Timothy 5

Muki vaya'aitegamo hisiya kavafe'mo ha pai'niya gemae

1 Kagaemo alopa vaya'aife'mo lokiya kagemo o'aika afokamofe'mo ha nepaina agufa kagemo aika hapa nepaika alika api aika apato. Konagakamogife'mo hapa nepaina agufa gemo huka neya vaya'aife'mo hapa nepaika alika api aika apato. 2 Itakamofe'mo ha nepaina agufa gemo huka alopa a'ne'aife'mo hapa paiyo. Kasakamogife'mo hapa nepaina agufa gemo huka venemo a'ne'aife'mo alagepa kaipamo kali'neka hapa paiyo.

Kogu a'ne'aitegamo hisaya kavafe'mo hu'niya gemae

3 Kogu a'nemo yagai'a apatesaya vaya'mo o'mai'nisayana siosi vaya'mogimo alagepa hu'a yagai'a apategae. 4 Ani kogu a'nemogi mafa'ne'apimo maige apakio'apimogi maige hu'a mai'nisayana afa'a yagai'a apategae. Kogu a'ne ita'api afo'apimogimo anona'apilefe'mo Gotife'mo mono kava hu'a yagai'a apategae. Goti'a ani kavafe'mo hau'nigeno'ae'mo, alagepa kava'mo hane'niye, huno nehiye. 5 Apakai'apige'mo mai'nisaya kogu a'nemogimo Gotifeke'mo apakesamo afi'apae'mo, afa'a laha maegaiye, hu'a hute'a nunumu'mo hu'a apatege feluga'e hani'ilaga'e'mo nunumu'mo huge hu'a ne'maiye. 6 Ne'maiya'monanafa apakufamo'mo hau'niya kava'mo nehaya kogu a'nemogimo afa'a mai'ne'apae'mo fali kavategamo ne'maiye. 7 Vai'mo o'alisayafe'mo ani kava'mo hiyo, huka hapa paiyo. 8 Mago vaya'mogi konaga'apimogite'mo alagepa hu'a no'yagaisayana hosu kava'mo nehaya'monanafa afamo anaga'apile'mo yagai'a no'apatesayana mago'e hu'a hosu kava'mo nehae. Ani kava'mo nehisaya vaya'mo mono gemo atale'a apakesa afi'a fatago nosaya vaya'aina mago'e hu'a ae'a apakase'a alagi hosu vaya'mo mai'nae.

9 Magoke vekale'mo mai'ne'apae'mo sigisiti'a kafugamo ae'a agase'a mai'nisaya kogu a'ne'ai apaki'apimo avo'mo kae maleyo. 10 Apakaefe'mo, alagepa kava'mo nehae, hu'a nehisage'a mai'ne'a mafa'ne'apile'mo yagai'a apatege nata vaya'aite'mo yagai'a apatege apaote vaya'ai apaiyamo sese hu'a apatege kana ali'nisaya vaya'aina hapa maege muki alagepa kavatefe'mo apayamukiki huge hu'a mai'nisaya kogu a'ne'ai apaki'apimo avo'mo kaeyo. 11 Saufa kogu a'ne'ai apaki'apimo avo'mo okaeyo. Apakaemo vele'mo maisaya kavafe'mo apakesamo afisaya'mo'mo Kalaisi'mo apakame'ya amigae. 12 Kalaisife'mo, ina kava'mo hugune, hu'a ha pai'naya gemo amagi'a atalesageno'ae'mo vai'mo apamigiye. 13 Mago'e hu'a hosu kava'mo hu'a ali'ya'mo o'ali'a alu nopi alu nopi'mo u'e'a nehu'apae'mo hosu faigoko gemo hulitata nehu'apae'mo himu'namu kava'mo hute'a, nagaeke'mo agete'na afi'nove, hu'a hute'a osisaya agufa gemo afa'a nehae. 14 Ani agufa kava'mo hugaya'mofe'mo saufa kogu a'nemogimo halate u'a vele'mo mai'ne'a mafa'nemo ali'a ne'apate'a no'apifi yate'mo yagaisayafe'mo nahau'niye. Ani kava'mo hisage'apae'mo kame vayatimogimo hu'a faipa hu'a latesaya ka'mo o'agegae. 15 Mani avo'mo okae'noge'apae'mo hogote'a mago kogu a'ne anaga'mogi malage hu'a alagepa ka'mo ago atale u'a Satani akame hu'nae. 16 Mago apakesa afi'a fatago nehaya vayapati'mo mago kogu a'nemo mai'nisayana ani vayapati'mo mago vekamomofi a kanomomofi huno afa'a yagaino atesiya kava'mo hane'niye. Siosi vaya'mogimo agai'age'mo mai'nisiya kogu a kanole'mo yagai'a atege mago alu kogu a'ne anaga'aite'mo yagai'a apatege hu'nisayana ani kogu a'nemogimo kanamo afa'a o'aligae.

Vayatama vaya'aitegamo hisaya kavafe'mo hu'niya gemae

17 Yagai'a ne'apataya vayatama vaya'mogi alagepa ali'ya'mo alisayana siosi vaya'mogi hapao ke he'a alagepa miya'apimo apamigae. Goti ge'amo ae'a hakalo hu'a ali'a apaya ne'malaya vayatama vaya'aina hogote'a miya'apimo afa'a apamigae. 18 Goti mukufi'mo avo'mo kae male'niya gemo'a huno'ae'mo, pulumakamogimo viti alaga ne'ya'mo haleti'ya'amo apaiyaleti'mo ae'a nehale'apae'mo ani ne'yapati'mo o'nesayafe'mo apavayale'mo nofiteti'mo kitapa o'apateyo, huno huteno mago'e gemo huno'ae'mo, ali'ya'mo ne'aliya vaya'mo miya'apimo alisaya vaya'mo mai'nae, huno hu'niye.

19 Magoke vekamo'a yagaino ne'apateya vayatama vekae'mo, hosu kava'mo nehiye, huno hisiya gemo o'afiyo. Lole vekala'moganimofi lole'e mago'e vaya'mogimofi hu'a e'a hisaya gege'mo afiyo. 20 Kagaemo muki vaya'ai apaulagale'mo hosu kava'mo hisaya vayatama vekae'mo, hosu kava'mo hu'nane, huka ha paige'apao muki vayatama vaya'mogimo afite'a koli hiyo. 21 Nagaemo Goti aulagalenagi Ala kava netimo Yesu Kalaisi aulagalenagi Goti'a lekana paino apate'niya enisole vaya'ai apaulagalenagi hu'na kaha pai'nae'mo, mani kava'mo huka alika fako huka apategefe hukae'mo fiku alika fako huka o'apateka hogoteka ani gemo aepa'amo afitekae'mo mago vaya'aitega'e alu vaya'aitega'e'mo lole agufa kava'mo osuka magoke aiyaya kavake'mo huka alika fako huka apato, hu'na kaha nepauve. 22 Siosi vaya'aite'mo yagai'a apatesaya vaya'mo lekana paika apateteka apakaete'mo malage huka kaya'mo maleka o'apato. Fiku yanageno lekana paika ate'nisana vekamo hosu kava'amo'mo kagaete'mo aino kamaesigeka kagaemo vai'mo aligane. Kaoteke'mo maiteka alagepa huka maiyo. 23 Kagaemo kaipa kagafu'mo kige kaita'mo kahauge nehigekae'mo anilafa'age'mo o'neka nofi alagafati ani'mo aise'amo lakiteka no. 24 Mago vaya'ai hosu kava'apimo hogoteno afole ne'aige'a agete'apae'mo ali'a fako hu'a ne'apataya'monanafa mago vaya'ai hosu kava'apimo ali'a fako hu'a ne'apataya afina'mo akamelegati'mo afole ne'aiye. 25 Ani kava huno mago vaya'ai alagepa kava'apimo vaya'ai apaulagale'mo hane'niya'monanafa o'age'naya alagepa kava'apimo alagi fala kino ohaneno afole aisige'a agegae.